رحمتك يارب

من سنه ونص تقريبا ولدت توءم بلال وبيجاد في ايطاليا وبعد الولاده كنت حاسه ان في حاجه فيا غلط بس طبعا رفاهيه اني اهتم بنفسي واروح لدكتور دي كانت منعدمه كان اقصا طموحي اناااااااام
فضلت ٤٠ يوم من الولاده وانا مش تمام خالص وسخونيه مستمره بدون سبب وبرضو انا مهمله واقول يمكن من الولاده والارهاق وقلة النوم
المهم رحت عملت تحليل دم وبعته للمستشفى اللي ولدت فيها ولقيتهم تاني يوم متصلين بيا اني اروحلهم بسرعه
وكنت يومها عامله

كشري مصري
عارفين يعني ايه كشري مصري في الغربه يعني حلم جميل
قلت اروح المستشفي في السريع انا وجوزي ولما ارجع ابقا اكل براحتي ودي كانت اول غلطه
لما رحت المستشفي لقيت كنسولتو دكاتره وممرضات في انتظاري ..خير يا جماعه 
بصي بدون مقدمات انتي عندك كانسر نادر بيجي مع الحمل بس وبيكون في المشيمه يعني لا ينفع استئصال ولا شيل رحم حالتك حر جه جدا لازم تبدءي بسرعه كيماوي ولازم مسح ذري ولازم تتحجزي حالا ..ولازم كتيررررررررر وساعتها ودني اتسدت
تخيلو يتقالي في وشي قدامك ١٠ ايام وتموتي لو مبدؤتيش حالا كيماوي
اتقالي كل الاعراض السيئه للكيماوي من قبل ما ابدءه بمنتها القسوه بس مكنش المرض شاغل بالي اصلا كل تفكيري كان هودي ولادي فين دول عندهم ٤٠ يوم واحنا بطولنا في الغربه ملناش الا ربنا
وبنتي الكبيره اللي متعلقه فرقبتي واهلي اللي هيتوجعوا عليا فمصر وهم مش قادرين يكونوا جنبي
طب الكشري اللي فلبيت مين هياكله دا انا هموت عليه
وجوزي يقولي احنا في ايه ولا في ايه ..يعني اموت ونفسي في الكشري
المهم اتحجزت علطول واتعملي مسح ذري واكتشفوا ان الورم انتشر في الرئه بسبب تاخيري لان نوع الورم دا شرس جدا ودي كانت تاني غلطه
عشان متغلطوش غلطتي كلوا اكلتكم المفضله قبل ما تعملوا مشاويركم المهمه عشان محدش عارف توابع المشوار ايه .. اخطفوا اي لحظه حلوه
واوعوا بلله عليكم لو حسيتوا بحاجه غلط في جسمكم تهملوا لان عواقب الاهمال ممكن تكون جسيمه
كل حاجه تتعوض الا الصحه
وربنا ما يكتبها على
حد