رحمتك يارب

ابدا
تعديل منحرمش من دعواتكم الحلوه
.. بقيه القصه اني اتحجزت في المستشفي وبدءت من تاني يوم كيماوي من اقوى نوع عشان يشوفوا استجابه جسمي ..مكنش في حاجه شايله همها غير ولادي بس ربنا من رحمته خلى الدوله تساعدني وعينولي اسره ترعى الولاد وحق ربنا الستات المصريات في ميلانو كلهم كانو عاوزين ياخدوا عيالي
انا شفت جدعنة الست المصريه عل حق و من رحمة ربنا بيا ان المستشفي خا طبت السفاره الايطاليه فمصر بسرعة اعطاء الفيزا ل بابا وماما لان الحاله النفسيه والصحيه محتاجه اهل
بس عارفين انا والله طول فتره مرضي ما زعلت بالعكس كنت دايما بضحك حتى شعري حلقته بنفسي وقلت بيدي لا بيد الكيماوي اصل هعترض عل قضاءه ليه
قضاء ربنا نافذ شئت ام ابيت ..
هو ابتلاني وانا راضيه وانا مؤمنه بالمقوله اللي بتقول ان الله لا يعطي اصعب معاركه الا لاقوى جنوده
شفت حواليا ناس بتكفر بربنا لانه اصابهم بالمرض وشايفين انهم ميستاهلوش المرض فالحمد لله عل نعمه الايمان
انا فضلت لمده ٧ شهور باخد جرعات كل اسبوع ..شعري وقع و صحتي ادهورت بس النفسيه بعون الله كانت حديد
مش شطاره مني لاء دي رحمه من ربنا بيا.. اللي هو قدر ولطف ..
الحمد لله جسمي استجاب للعلاج
والحمد لله الذي شفاني وعافني وابويا وامي كانو معايا وجوزي كان سندني وعمره ما حسسني ان شكلي اتغير او غير صالحه بالعكس مع اني كنت بسمع كلام يسم البدن بس مكنش بيهمني زي ازاي جوزك شايفك من غير شعر وازاي بيتعامل عادي معاكي
اكن مفروض الست مننا تموت وحياتها تنتهي لمجرد اصابتها بمرض زي ده
تجربه الكانسر اتعلمت منها دروس كتير اوووووي
وعرفتني على ناس كانت بتزوني في المستشفى من غير سابق معرفه ودي المحبه في الله
واحلى واهم حاجه اتعلمتها اليقين في رحمته ..ربنا كريم اوووووووووووووووووي وبيحبنا وبيبتلينا محبه
اذا احب عبدا ابتلاه